Catastròfa mondializada

Jòrdi Blanc
Le Tarn libre del 7/1/2004.

Mondializacion : espèr per d’unes, crenta per d’autres ! Çò segur aquò’s que i a pas agut aquesta pontanada (1) de mot mai emplegat qu’aqueste al nivèl de las relacions internacionalas. Pr’aquò, quitament los que pintavan aquela mondializicion de las colors pus foscas e del biais pus apocaliptic, se son pas jamai imaginat una mena de mondializacion coma la que venem de viure, amb lo seisme que ven d’afrabar de regions entièiras d’un dezenat de païses de l’Asia del Sud-Est.
Gras 9 a l’escala de Richter, un dels cinq pus fòrts dempuèi 1900. Pel mens 150 000 mòrts, sens comptar las victimas probablas de las marranas e del manca de suènhs e de socorses, la novetat es pas tant l’ample de la catastròfa que la nacionalitat de las victimas. A Japon, en Turquia, en Algeria o en Iran los tèrratrems (2) tuavan gaireben son que d’estatjants del païs. Alara que, dins las zònas toristicas tocadas Taïlanda, Indonesia, India, Sri Lanka o Islas Maldivas : la pòrta a costat amb los salaris de misèria d’aqueles païses dempuèi d’annadas per un Occidental mejan « i aviá tantes o maites de Suedeses, d’Alemands, de Britanics, de Franceses e d’autres Europencs, mas tanben de Turcs e d’Israëlians, d’Americans, d’Autralians e de Neozelandeses que de mond del païs.
Un tsunami en Taïlanda e es la pus granda catastròfa nacionala en Suèda dempuèi la darrièra guèrra mondiala. 3000 mòrts e desapareguts o maites. Çò que fa dire a l’arquevesque luterian : « Los paures enfants de per carrièiras e los enfants de rics dels toristas occidentals son emportats ensemble dins un destin comun ». Mas, tu te’n vas e ieu demòri : aquò empacha pas que los del païs e que pòdon pas ni se far suenhar ni partir endacòm mai ne patiràn mai que los autres e pendent d’annadas, mentre que los païses d’origina dels toristas i coneiràn pas res, manca un aflaquiment de la chifra d’afars de las agéncias de viatge.
S’aquò podiá far davalar de las nivols los privilegiats que sèm, qu’amb los nòstres dolars o los nòstres euros, consideram que tot nos es degut e mai de nos anar far rostir la codena per qualques jorns a l’autre cap del mond, quin que ne siá lo còst ecologic ! Sai que l’emocion nos pertòca, los mediàs se mobilizan, e i a quitament una competicion nacionala e internacionala per las ajudas, mas per quant de temps ?
Los observatòris astronomics se son trachats, l’espaci de qualquas segondas que la tèrra « qu’es encara jove e que viu, aquò’s la bona novèla « tremolèt sus son ais. Mas ai plan paur, que passat los subte, tot tòrne virar coma abans.

(1) Période.
(2) Tremblement de terre.

Publicités

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s