Crida per la manifestacion del 22 d’octobre a Carcassona

Anem ! per la lenga occitana, òc !

La França vòl èstre lo pòrtaparaula en Euròpa e dins lo monde de la diversitat lingüistica e culturala. Pasmens, sul territòri francés la situacion legala es catastrofica per tots los que vòlon trabalhar en favor de la diversitat lingüistica. La transmission de l’occitan es menaçada per l’abséncia d’una politica positiva per son desvolopament.
L’article 2 de la constitucion tal coma es redigit es una arma contra la lenga occitana, dins tots los domenis.
L’abséncia d’una legislacion positiva que reconesca los drets de nòstra lenga es contrària als principis d’egalitat que son los de la Republica. Es contrària als principis que son los d’una Euròpa « unida dins la diversitat »
Nosautres trabalham per la lenga occitana. Volem crear las condicions de son desvolopament. Trabalham pel restabliment de la transmission de l’occitan. Trabalham tanben per totes los que vivon en Occitània e qu’an dret a conéisser la cultura occitana. Trabalham per que la lenga occitana pòsca viure coma una de las lengas ofèrtas a l’umanitat.
Per aquò, sul territòri ont se parla la lenga occitana, cal crear un environament favorable a l’ensenhament de la lenga e dins la lenga. Cal que lo contèxte legal siá favorable a la creacion en occitan, a la preséncia de la lenga dins los mediàs audiovisuals e escrits, a l’emplec de la lenga dins la vida publica e de segur al restabliment de la transmission familiala.

Los mèdias
Los mèdias devon aculhir la lenga de mai d’un biais :
per la creacion d’un vertadièr servici public de ràdio e de television en lenga occitana
per l’ajuda especifica a operators privats (ràdios associativas, televisions, premsa escrita) que trabalhan en favor de la lenga occitana

La creacion
L’ensemble de la creacion en occitan deu beneficiar d’una politica de sosten particulara :
es una politica en favor de l’edicion, del teatre, de l’espectacle viu en general, del cinemà e de la musica ;
es una accion d’informacion alprèp de la populacion per que pòsca apprendre çò qu’es lo patrimòni cultural occitan, que tròp sovent li foguèt amagat.

L’ensenhament
L’ensenhament de l’occitan e en occitan deu èstre desvolopat dins cinc direccions :
l’ensenhament per immersion practicat duscas ara per las escòlas associativas Calandreta
l’ensenhament a partitat orària qu’es practicat e mes en òbra dins lo servici public
l’ensenhament de lenga e cultura occitanas, de l’escòla a l’universitat, valorizat als examèns e concorses
un ensenhament de sensibilizacion integrat als oraris normaus
lo sosten a la mesa en plaça de corses pels adultes que vòlon aprendre l’occitan o perfeccionar lor coneissença

La vida publica
L’occitan dèu èstre present dins la vida publica. Aquò vòl dire per exemple :
lo respècte de la toponimia e la mesa en plaça d’una senhalizacion bilingua ;
l’encoratjament a l’utilizacion de la lenga dins los lòcs publics, per las collectivitats localas, o dins las manifestacions publicas, e pas sonque las qu’an un caractèr festiu o cultural ;
l’encoratjament de l’utilizacion de la lenga dins la vida sociala (lòcs de trabalh, lòcs d’acuèlh del public…).

Totas las demandas exprimidas dins lo domèni de l’ensenhament, la creacion, los mediàs e la vida publica permetràn de crear un contèxte favorable a la recuperacion de l’occitan, al restabliment de la transmission familiala e al desvolopament del biais de viure portat per la cultura e la lenga occitanas. Nòstra accion a per amira la preservacion de la diversitat culturala e lingüistica en demandar lo respècte dels drets de la lenga occitana.
La politica lingüistica que demandam serà lo produit de l’accion e de la volontat de las collectivitats occitanas e de l’Estat. L’Estat deu facilitar la mesa en plaça d’aquela politica en prenent en carga çò qu’es de sa responsabilitat e en adaptar sa legislacion.

Lo collectiu « Manifestar per l’occitan »

Publicités

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s