PRO DEL MODÈLE UNENC….

Tèxte paregut dins La Semaine du Minervois (6/10/05).
Lo setmanièr publicarà 4 paginas especialas 22 d’octobre dins lo n° del
20/10 e una pagina tota en oc a comptar del 1/01/06.
(Semaine du minervois BP 19 11700-Pépieux)

PRO DEL MODÈLE UNENC….

S’es ja parlat dins aquestas paginas de l’afar pietadós del Collègi del
Bastion de Carcassona e de sa seccion bilingue francés-occitan trèva ! Aquí
un establiment qu’anoncièt la dobertura d’aquela opcion, que recrutèt
l’ensenhaire per assegurar los corses d’occitan e los corses d’istòria e
geografia en lenga nòstra, qu’aviá mainatges marcats e que, fin finala, al
moment de la dintrada diguèt qu’aquò se fariá pas ongan (avián ja fait lo
còp l’an passat). Ara, dabans las protèstas dels parents, de las
associacions, dels sendicats e dels elegits, explican que la seccion es «
administrativament dobèrta » mas que fonciona pas !!!
Aquí que nos arriban novèlas de Bretanha ont una classa bilingue de mairala
d’An Oriant espèra dempuèi la dintrada l’ensenhaire que parla breton ! Los
mèstres e los parents protèstan. L’inspectritz demanda que los mainatges
s’enlèven lo papièr « Me a gomz brezhoneg » (Parli breton) e que se veja pas
mai un « gwen ha du » (bandièra bretona) dins l’escòla. Quant a respondre a
la demanda dels parents, es un autre afar ! (Per sosténer, peticion en linha
: http://merville.maternelle.free.fr)

Aquí que nos arriban novèlas d’Alsàcia ont una classa de collègi bilingue
francés-alemand, dins lo perlongament del primari, es pas dobèrta. Los
parents aquí tanben cridan e pòrtan l’afar al Tribunal administratiu. Lo
rector trapa una responsa de primièra : « Ganharàn pas : perdon pas un
dreit, l’escòla a per primièra tòca d’ensenhar en francés » E passa que
t’ai vist !

Aquí que del costat de l’UNESCO, a París sioplèt, se va signar un tèxte
internacional pel respècte de la diversitat culturala, que la diversitat
linguistica ne fa part. Anam aver encara qualquas polidas declaracions a la
TV sus aquò !

Unas associacions per la francofonia comprenon que cal lutar contra lo
tot-inglés e salvar fòrt e fèrme lo francés. Pr’aquò, preparan una
manifestacion dins una vila simbolica : Villers-Cotterets. E òc, per
ramentar aquel Edicte de 1539 que metèt lo francés lenga juridica e oficiala
e escanèt las autras lengas. Bonjorn la dobertura d’esperit !
Alara, los partesans d’una vertadièra democracia culturala apiejada sul
respècte de totas las culturas e de totas las lengas, traparàn dins aquelis
faches de bonas rasons de mai de venir crida per carrièras lo 22 d’octobre a
Carcassona : « Anem ! Per la lenga occitana ! Òc ! »

Pluricultural Roch

=======================
Anem ! Per la lenga occitana ! Òc !
Manifestacion per la lenga occitana,
lo dissabte 22 d’octobre de 2005, 14 oras,
a Carcassona :
http://www.manifestarperloccitan.com

Publicités

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s