Lo Lemosin, una eco-region aura !

Credada a l’amassada de tots los ecologistas lemosins

La convergència de las crisis, que sian climatica, economica, sociala, environamentala, alimentària, marca la falhida d’un sistèma basat sus l’apropriacion frenetica de las richesas, la creguda de las inegalitats e lo pilhatge de las ressorças naturalas. Demanda un chambiament radicau e una responsa globala que l’ecologia politica sola es capabla de prepausar. Las mesuras de petaçatge sufisen pus.

D’aura en lai, quò es l’imperatiu ecologic e sociau que deu apelar nòstras chausidas politicas. La reconversion ecologica de l’economia, creatritz d’emplecs pas delocalisables e de richesa partejada, deu remplaçar l’economia de la renda, de l’especulacion, dau productivisme e de la surconsomacion. S’agís de prepausar de las solucions concretas de decreissença de nòstra piada ecologica qu’anguessan de parelh emb una creguda dau mielhs-viure per totas e tots.

Quò pus preissat es de s’amassar per l’i participar. Pas deman, nimai benleu.
Aura e ardich ! Nòstra responsabilitat individuala e collectiva es engatjada.

La campanha d’Euròpa Ecologia, au temps de la votacion europenca, mostret la creativitat e l’eficacitat daus actors de l’ecologia, amassats dins lo respect de lor diversitat. Aquela dinamica de l’amassada se deu persegre e prener de vam au niveu regionau.

Lo diagnostic daus ecologistas fàcia a las crisis es anueit parcit per beucòp de monde, mas soles los ecologistas an la volontat e la capacitat de metre en òbra de las responsas concretas.
Per vertadierament pesar sus las decisions, far evoluar las politicas e botar en plaça una vertadiera eco-region, l’amassada nascuda au temps de las europencas se deu concretizar tanben au niveu regionau.

Podrem entau crear una suspresa sens pariera perque chadun podrà creire ad un chambiament vertadier. Aqueu chambiament vendrà de la partida mai radicalament reformista e avant-gardista de l’esventau politic, d’aquela dinamica d’Euròpa-Ecologia, que pòt modifiar en prigondor la politica regionala actuala.

La realitat de l’engatjament sociau e umanista de l’amassada daus ecologistas se legirà dins nòstras platafòrmas programaticas e a gran de besonh d’èsser provada per de las alianças a priòri. L’ecologia se declina necessariament dins los champs economic, sociau, solidari, culturau, sanitari, educatiu… Per nosautres, la justícia sociala se pòt pas deisseparar de nòstre engatjament per la planeta.

Ecologistas politics o associatius, regionalistas, altermondialistas, sindicalistas, paisans, entrepreneires, artisans de la transformacion au quotidian, ciutadans autonòmes, solidaris e responsables, devem tots obrar ensems perfin que nòstra region, que dispausa de tots los atots necessaris per çò qu’es de las ressorças umanas e d’environadís, manquesse pas aqueu rendetz-vos de las regionalas de 2010 qu’engatja l’avenir nòstre.

Ensems per:

  • Afirmar l’ecologia coma paufer per surtir de la crisi, per lo jasiment d’emplecs que pòt generar dins de domenis nombrós (agricultura, transpòrt, bastit, reparacion, reciclatge, comerci de proximitat, torisme verd, proteccion daus ecosistemas, desvelopament de la filiera bòsc, …),
  • Promòure e sostener una agricultura paisana de nauta valor d’environadís, e mai que mai, l’agricultura biologica, que permet l’alimentacion sana e fornissairitz d’emplecs,
  • Far de l’educacion e de la formacion professionala daus gatges de reconversion ecologica de l’economia regionala,
  • Agir per un aisinament dau territòri qu’integre febla piada ecologica e vertadier fialat de servicis publics, per los transpòrts collectius, mai que mai ferroviaris (viatjaires e frèt), dau desvolopament dau naut e plan naut debit per tots, dau sosten e desvolopament de las entrepresas en mitan rurau…,
  • Promòure activament la lenga occitana, que farja l’identitat de nòstra region e de sos abitants,
  • Acompanhar una economia fondada sus la nauta valor ecologica e sociala, sostener l’economia solidària, desvelopar los circuits corts,
  • Desvelopar lo torisme alternatiu, que deu esser lo pòle principau per estructurar l’òfra lemosina,
  • Obrar per una politica culturala que mene dau ligam sociau, consirosa de l’environadís, e partejada d’un biais escalibrat sus lo territòri,
  • Far una prioritat d’una cooperacion internacionala basada sus de las solucions ecologicas adaptadas, qu’impliquen plenament e directament los abitants concernats, dins lo respiech de lor biais de viure e de lor environadís,
  • Balhar los mejans ad una vertadiera politica d’ environadís,
  • Contribuar au desvelopament d’una politica de prevencion en matèria de santat e un accès aus soenhs de qualitat per tots.

Nòstra responsabilitat es bela, siam ensemble a la nautor daus enjuecs!

Rejunhetz la dinamica, signatz e fasetz signar la credada nòstra !

Per corrier: Amassada regionala daus ecologistas en Lemosin
11 rua Delescluze 87000 LIMÒTGES / Limoges

adreça electronica: je.signe@rassemblement-limousin.org
site: http://www.rassemblement-limousin.org/

Publicités

3 réflexions sur “Lo Lemosin, una eco-region aura !

  1. Manca quauquare per la cooperacion entre regions occitanas vesinas , non??
    E per desvelopar un trin pendular Paris Tolosa en plaça dau TVG de Peitiers a Limotges e desvcelopar los transports collectius de bus e los equipaments per las bicicletas ( pistas eca )
    E per l occitan fau de las precisions de ço que voletz far !!! ( mbei un budgèti)

    • Segur tot i es pas. Lo manifest es pas lo programa que deuria esser mai complet. Sem trapats a l’i trabalhar…
      Quò mai malaisat sera beleu de se botar d’accòrd sus la politica linguistica. La propausicions son sus la taula… mas lo P. Oc es pas tot sole. I a beucòp de monde a convencer…Aus verds de ‘vançar sus quela question…

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s